ഒമിക്രോണ്: രാജ്യത്ത് ആറ് എയര്പോര്ട്ടുകളില് ആര്ടിപിസിആര് നിര്ബന്ധം
കൊവിഡ് 19 രോഗം ( Covid 19 ) പരത്തുന്ന വൈറസിന്റെ ഏറ്റവും പുതിയ വകഭേദമാണ് ഒമിക്രോണ് (Omicron ). നേരത്ത പല രാജ്യങ്ങളിലും ശക്തമായ തരംഗത്തിന് ഇടയാക്കിയ ഡെല്റ്റ ( Delta ) വകഭേദത്തെക്കാളും ഇരട്ടിയിലധികം വേഗതയിലാണ് ഒമിക്രോണ്രോഗവ്യാപനം നടത്തുന്നത്. അതുകൊണ്ട് തന്നെ ഒമിക്രോണ് സ്ഥിരീകരിച്ച രാജ്യങ്ങളിലെല്ലാം തന്നെ കനത്ത ആശങ്കയാണ് തുടരുന്നത്.
ഇപ്പോഴിതാ രാജ്യത്തെ ആറ് വിമാനത്താവളങ്ങളില് ആര്.ടി.പി.സി.ആര് പരിശോധന നിര്ബന്ധമാക്കി കേന്ദ്ര സര്ക്കാര്. ഒമിക്രോണ് വ്യാപനത്തെ തുടര്ന്ന് ഹൈ റിസ്ക് വിഭാഗത്തില്പ്പെടുത്തിയിട്ടുള്ള രാജ്യങ്ങളില് നിന്ന് എത്തുന്നവര്ക്കാണ് പരിശോധന നിര്ബന്ധമാക്കിയത്. ടെസ്റ്റ് നടത്തുന്നതിനായി മുന്കൂട്ടി ബുക്ക് ചെയ്യാനുള്ള സൗകര്യം എയര് സുവിധ പോര്ട്ടലില് സജ്ജമാക്കും. ഡല്ഹി, മുംബൈ, കോല്ക്കത്ത, ബംഗളൂരു, ചെന്നൈ, ഹൈദരാബാദ് എന്നീ വിമാനത്താവളങ്ങളില് എത്തുന്ന യാത്രക്കാരാണ് മുന്കൂട്ടി ബുക്ക് ചെയ്യേണ്ടത്.
സിവില് ഏവിയേഷന് മന്ത്രാലയം ഇത് സംബന്ധിച്ച ഉത്തരവ് പുറത്തിറക്കിയിട്ടുണ്ട്. സാധാരണഗതിയില് ആര്ടിപിസിആര് പരിശോധനയുടെ നിരക്ക് 500 രൂപയാണ്. എട്ട് മണിക്കൂറിനുള്ളില് ഫലം ലഭിക്കും. പെട്ടെന്ന് ഫലം ലഭിക്കുന്ന റാപ്പിഡ് പരിശോധനയ്ക്ക് 3500 രൂപയായിരിക്കും. 30 മിനിറ്റ് മുതല് ഒന്നര മണിക്കൂറിനുള്ളില് റാപ്പിഡ് ടെസ്റ്റ് പരിശോധനാഫലങ്ങള് ലഭ്യമാകും. യാത്രക്കാര്ക്ക് മറ്റ് ബുദ്ധിമുട്ടുകളില്ലെന്ന് കണ്ടാല് രാജ്യത്തെ മറ്റ് വിമാനത്താവളങ്ങളിലേക്കും ഇത് വ്യാപിപ്പിക്കും.
വിമാനത്താവളങ്ങളില് മുന്കൂട്ടി ബുക്ക് ചെയ്യേണ്ടത് ഇങ്ങനെ
സന്ദര്ശിക്കുന്ന അന്താരാഷ്ട്ര വിമാനത്താവളത്തിന്റെ ഔദ്യോഗിക വെബ്സൈറ്റ് സന്ദര്ശിക്കുക. ഏറ്റവും മുകളിലായി കാണുന്ന 'ബുക്ക് കോവിഡ് 19 ടെസ്റ്റ്' ക്ലിക്ക് ചെയ്യുക. അന്താരാഷ്ട്ര യാത്രക്കാരന് എന്നത് തിരഞ്ഞെടുക്കുക. പേര്, ഇമെയില്, ഫോണ് നമ്പര്, ആധാര് നമ്പര്, പാസ്പോര്ട്ട് നമ്പര്, മേല്വിലാസം, എത്തിച്ചേരുന്ന സമയം, തീയതി എന്നിവ രേഖപ്പെടുത്തുക. ആര്ടിപിസിആര്, റാപ്പിഡ് ആര്ടിപിസിആര് എന്നിവയില് നിന്ന് പരിശോധനാ രീതി തിരഞ്ഞെടുക്കുക.