' പട'യുടെ ക്യാരക്ടര്‍ പോസ്റ്റര്‍ പുറത്തുവിട്ട് കുഞ്ചാക്കോ ബോബന്‍
ഒട്ടേറെ നല്ലവേഷങ്ങള്‍ കൊണ്ട് മലയാള സിനിമയില്‍ സാന്നിധ്യം ഉറപ്പിച്ചുനിര്‍ത്തിയ നടനാണ് കുഞ്ചാക്കോ ബോബന്‍. ഭീമന്റെ വഴിക്ക് ശേഷം കുഞ്ചാക്കോയുടെ മറ്റൊരു ചിത്രം കൂടി പ്രദര്‍ശനത്തിനെത്തുന്നു. 'പട' എന്നാണ് ചിത്രത്തിന്റെ പേര്. ഇതിന്റെ ക്യാരക്ടര്‍ പോസ്റ്റര്‍ പുറത്തുവിട്ടു.
കുഞ്ചാക്കോ ബോബനാണ് പോസ്റ്റര്‍ സാമൂഹിക മാധ്യമങ്ങളിലൂടെ പുറത്തുവിട്ടത്. ഇന്ദ്രന്‍സ് അവതരിപ്പിക്കുന്ന സഖാവ് കണ്ണന്‍ മുണ്ടൂര്‍ എന്ന കഥാപാത്രത്തെയാണ് ചിത്രത്തിന്റെ അണിയറപ്രവര്‍ത്തകര്‍ പരിചയപ്പെടുത്തുന്നത്. ചിത്രം ഫെബ്രുവരി 11ന് പ്രദര്‍ശനത്തിനെത്തും. 25 വര്‍ഷം മുമ്പ് കേരളത്തെ നടുക്കുകയും വലിയ ചര്‍ച്ചകള്‍ക്ക് കാരണമാവുകയും ചെയ്ത ഒരു സംഭവമാണ് പട ചര്‍ച്ച ചെയ്യുന്നത്.
വിനായകന്‍, ദിലീഷ് പോത്തന്‍, ജോജു ജോര്‍ജ് എന്നിവരാണ് ചിത്രത്തിലെ മറ്റ് കഥാപാത്രങ്ങള്‍. ബാലു കല്ലൂര്‍ എന്ന കഥാപാത്രത്തെയാണ് വിനായകന്‍ അവതരിപ്പിക്കുന്നത്. അരവിന്ദന്‍ മണ്ണൂരായി ജോജു ജോര്‍ജും രാകേഷ് കാഞ്ഞങ്ങാടായി കുഞ്ചാക്കോ ബോബനും എത്തുന്നു. 'ഐഡി' എന്ന ചിത്രത്തിന് ശേഷം കെ എം കമല്‍ സംവിധാനം ചെയ്യുന്ന ചിത്രമാണ് 'പട'. സമീര്‍ താഹിറാണ് ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത്. ഗോകുല്‍ ദാസ് കലാസംവിധാനവും, അജയന്‍ അടാട്ട് ശബ്ദസംവിധാനവും നിര്‍വ്വഹിക്കുന്നു. ഇ 4 എന്റര്‍ടെയ്ന്‍മെന്റും എവിഎ പ്രൊഡക്ഷന്‍സും ചേര്‍ന്നാണ് ചിത്രത്തിന്റെ നിര്‍മ്മാണം
