സഹ റഫറിയുടെ തലയിലേക്കു ബീയര്‍ ബോട്ടില്‍ വലിച്ചെറിഞ്ഞ് ആരാധകന്‍
ജര്‍മന്‍ ബുന്ദസ്ലിഗ ഫുട്‌ബോള്‍ മത്സരത്തിനിടെ, സഹ റഫറിയുടെ തലയിലേക്കു ബീയര്‍ ബോട്ടില്‍ വലിച്ചെറിഞ്ഞ് ആരാധകന്‍. കാണികളില്‍ ഒരാള്‍ ഗ്രൗണ്ടിലേക്കു വലിച്ചെറിഞ്ഞ ബീയര്‍ ബോട്ടില്‍ സഹ റഫറിയുടെ തലയില്‍ പതിച്ചതിനെ തുടര്‍ന്ന് മത്സരം റദ്ദാക്കി. വെള്ളിയാഴ്ച വൈകിട്ടു നടന്ന ബോച്ചം- ബോറൂസിയ മോയെന്‍ചെങ്ലാബാഷ് മത്സരത്തിനിടെയാണ് സംഭവം.
'വളരെ വേദനാത്മകവും നിരാശാജനകവുമായ ദിവസം. മഠയനായ ഒരു ആരാധകന്റെ ബോധശൂന്യമായ പ്രവൃത്തി. ഇത്തരം സംഭവങ്ങള്‍ ഒരിക്കലും ആവര്‍ത്തിക്കപ്പെടരുത്. നല്ലൊരു ഫുട്‌ബോള്‍ മത്സരം ഇങ്ങനെ അവസാനിച്ചാല്‍ എങ്ങനെയാണു ദേഷ്യം വരാതിരിക്കുക?' മോയെന്‍ചെങ്ലാബാഷ് സ്‌പോട്ടിങ് ഡയറക്ടര്‍ പ്രതികരിച്ചു.
മോയെന്‍ചെങ്ലാബഷ് 2-0നു മുന്നിട്ടു നില്‍ക്കെ 71-ാം മിനിറ്റിലാണ് ലൈന്‍സ്മാന്‍ ഏറുകൊണ്ടു നിലത്തു വീണത്. 20 മിനിറ്റിനു ശേഷം റഫറി മത്സരം നിര്‍ത്തിവയ്ക്കാനുള്ള നിര്‍ദേശം നല്‍കി. പിന്നാലെ സംഭവത്തെ സമൂഹ മാധ്യമങ്ങളിലൂടെ ശക്തമായി അപലപിച്ച് ഇരു ടീമുകളും രംഗത്തെത്തി.
