ഐടി കമ്പനികള്‍ സാധാരണനിലയിലേക്ക്; ഘട്ടം ഘട്ടമായി ജീവനക്കാര്‍ ഓഫീസിലെത്തും
കൊറോണ വൈറസ് കേസുകള്‍ ക്രമാതീതമായി കുറയുന്ന സാഹചര്യത്തില്‍ ജീവനക്കാരെ തിരികെ ഓഫീസിലേക്ക് വിളിക്കുകയാണ് രാജ്യത്തെ മിക്ക ഐടി കമ്പനികളും. മറ്റ് ചില കമ്പനികള്‍ അവരുടെ ജീവനക്കാരുടെ സുരക്ഷ കണക്കിലെടുത്ത് ഹൈബ്രിഡ് മോഡല്‍ സ്വീകരിക്കാനാണ് നോക്കുന്നത്.
ടാറ്റ കണ്‍സള്‍ട്ടന്‍സി സര്‍വീസസും എച്ച്‌സിഎല്ലും ഹൈബ്രിഡ് മോഡല്‍ തിരഞ്ഞെടുക്കുന്ന കമ്പനികളില്‍പ്പെടുന്നു. കോഗ്‌നിസന്റും ഇന്‍ഫോസിസും ജീവനക്കാരെ ഘട്ടം ഘട്ടമായുള്ള ഓഫീസിലെത്തിക്കാന്‍ പദ്ധതിയിടുന്നു. ലോകമെമ്പാടുമുള്ള കോവിഡ് സാഹചര്യം മെച്ചപ്പെടുകയും ഇപ്പോള്‍ അതിലെ ഭൂരിഭാഗം സഹകാരികളും അവരുടെ കുടുംബങ്ങളും വാക്‌സിനേഷന്‍ എടുക്കുകയും ചെയ്തതിനാല്‍, ഒരു ഹൈബ്രിഡ് പ്രവര്‍ത്തനരീതിയിലേക്ക് മാറുകയാണെന്ന് ടാറ്റ കണ്‍സള്‍ട്ടന്‍സി സര്‍വീസസ് നേരത്തെ പറഞ്ഞിരുന്നു. ജീവനക്കാരെ വരും മാസങ്ങളില്‍ ഓഫീസുകളിലേക്ക് തിരികെ കൊണ്ടുവരുമെന്നാണ് കമ്പനി പറഞ്ഞത്.
സീനിയര്‍-മാനേജ്മെന്റ് തലത്തിലുള്ള എക്സിക്യൂട്ടീവുകള്‍ പതിവായി ഓഫീസുകളില്‍ നിന്ന് ജോലി ചെയ്യാന്‍ തുടങ്ങി.
പലരാജ്യങ്ങളിലുള്ള ഓഫീസുകള്‍ സാമൂഹിക അകലവും കോവിഡ് 19 പ്രോട്ടോക്കോളും പിന്തുടരുന്നുണ്ടെന്നും ജീവനക്കാര്‍ക്ക് ജോലി ചെയ്യാന്‍ വളരെ സുരക്ഷിതമായ അന്തരീക്ഷമാണെന്നും ടാറ്റ കണ്‍സള്‍ട്ടന്‍സി കൂട്ടിച്ചേര്‍ത്തു. ഐടി പ്രമുഖരായ എച്ച്‌സിഎല്‍ ടെക്‌നോളജീസും കമ്പനിയുടെ മുന്‍ഗണനകളിലൊന്ന് ജീവനക്കാരുടെയും അവരുടെ കുടുംബങ്ങളുടെയും സുരക്ഷയും ക്ഷേമവുമാണെന്ന് നേരത്തെ പറഞ്ഞിരുന്നു. ബിസിനസ്സ് സാധാരണ നില നിലനിര്‍ത്തുന്നതിനും അതുവഴി ക്ലയന്റുകള്‍ക്ക് തടസ്സമില്ലാത്ത സേവനങ്ങള്‍ ഉറപ്പാക്കുന്നതിനും ആഴത്തില്‍ പ്രതിജ്ഞാബദ്ധരാണെന്നാണ് കമ്പനി പറഞ്ഞത്.
അതിനിടയില്‍, ഐടി പ്രമുഖരായ ഇന്‍ഫോസിസും 'ഓഫീസിലേക്ക് ഘട്ടംഘട്ടമായി മടങ്ങാന്‍' പദ്ധതിയിടുന്നതായി അറിയിച്ചു. ആഴ്ചയില്‍ ഒന്നോ രണ്ടോ ദിവസം ഓഫീസില്‍ നേരിട്ട് ഹാജരാകാന്‍ ജീവനക്കാരെ പ്രോത്സാഹിപ്പിക്കുന്നതിനിടെ, 40-50 ശതമാനം വരുന്ന ഒരു ഹൈബ്രിഡ് മോഡലാണ് കമ്പനി പ്രതീക്ഷിക്കുന്നതെന്ന് ഇന്‍ഫോസിസ് എക്സിക്യൂട്ടീവ് വൈസ് പ്രസിഡന്റും ഹെഡുമായ (എച്ച്ആര്‍) റിച്ചാര്‍ഡ് ലോബോ പറഞ്ഞു.
