പൊതു ഇടങ്ങളിലെ വൈ-ഫൈ ഉപയോഗിക്കാറുണ്ടോ? നിങ്ങളുടെ വിവരങ്ങള് ഹൈജാക്ക് ചെയ്യപ്പെടാം
പൊതു ഇടങ്ങളിലെ വൈ-ഫൈ നെറ്റ് വര്ക്കുകളിലെ സുരക്ഷിതത്വത്തെക്കുറിച്ച് ബോധവല്ക്കരണവുമായി കേരള പൊലിസ്. മാളുകള്, എയര്പോര്ട്ടുകള്, ഹോട്ടലുകള്, സര്വകലാശാലകള്, മറ്റ് പൊതു സ്ഥലങ്ങള് എന്നിവയിലെ വൈഫൈ ഹോട്ട്സ്പോട്ടുകള് ഉപയോഗിച്ച് വെബ്സൈറ്റുകളിലൂടെയോ മൊബൈല് ആപ്പുകളിലൂടെയോ വിവരങ്ങള് കൈമാറുമ്പോള് മറ്റാര്ക്കെങ്കിലും അവ കൈക്കലാക്കാനുള്ള സാധ്യതയുണ്ടെന്ന് കേരള പൊലീസ് മുന്നറിയിപ്പ് നല്കി.
സൗജന്യമായി ലഭ്യമാകുന്ന ഹാക്കിംഗ് ഉപകരണങ്ങള് ഉപയോഗിച്ച് പരിമിതമായ സാങ്കേതിക പരിജ്ഞാനമുള്ള ഉപയോക്താക്കള്ക്ക് പോലും നിങ്ങളുടെ വിവരങ്ങള് ശേഖരിക്കാന് സാധിക്കും.നിങ്ങളുടെ വ്യക്തിഗത വിവരങ്ങള്, സ്വകാര്യ രേഖകള്, കോണ്ടാക്റ്റുകള്, കുടുംബ ഫോട്ടോകള്, ലോഗിന് ക്രെഡന്ഷ്യലുകള് എന്നിവയും നഷ്ടപ്പെടാനിടയുണ്ട്. സാമ്പത്തിക വിവരങ്ങള് സൂക്ഷിക്കുന്ന സൈറ്റുകള് ഉള്പ്പെടെ - മറ്റ് വെബ്സൈറ്റുകളില് നിങ്ങളുടെ യൂസര് ഐഡികളും പാസ്വേഡുകളും ഹാക്ക് ചെയ്യുന്നതിനോ അല്ലെങ്കില് നിങ്ങളുടെ കോണ്ടാക്റ്റ് ലിസ്റ്റുകളിലെ ആള്ക്കാരെ തട്ടിപ്പിനിരയാക്കുന്നതിനോ നിങ്ങളുടെ അക്കൗണ്ട് ഉപയോഗിക്കാമെന്നും പൊലീസ് പറയുന്നു.