രാജി വയ്ക്കാൻ തയ്യാറെന്ന് ഉദ്ധവ്, പ്രകൃതിവിരുദ്ധ സഖ്യത്തിൽ നിന്ന് പുറത്ത് കടക്കണമെന്ന് ഷിൻഡെ
ശിവസേനയുടെയും പ്രവർത്തകരുടെയും നിലനിൽപ്പ് ഉറപ്പാക്കാൻ, കോൺഗ്രസുമായും എൻസിപിയുമായുമുള്ള "പ്രകൃതിവിരുദ്ധ സഖ്യത്തിൽ" നിന്ന് പുറത്തുകടക്കേണ്ടത് ആവശ്യമാണെന്ന് മഹാരാഷ്ട്ര നഗരവികസന, പൊതുമരാമത്ത് മന്ത്രി ഏകനാഥ് ഷിൻഡെ. ഷിൻഡെ ക്യാമ്പിൽ ചേരുന്ന ശിവസേന എംഎൽഎമാരുടെ യഥാർത്ഥ എണ്ണത്തെക്കുറിച്ചുള്ള ഊഹാപോഹങ്ങൾക്കിടയിലാണ് ഈ ട്വീറ്റ്.
"എംവിഎ സർക്കാരിന്റെ കീഴിലുള്ള കഴിഞ്ഞ രണ്ട് വർഷങ്ങളിൽ, ശിവസൈനികർ നിരാശരായപ്പോൾ സഖ്യകക്ഷികൾക്ക് മാത്രമാണ് നേട്ടമുണ്ടായത്. ഞങ്ങളുടെ സഖ്യകക്ഷികൾ ശക്തി പ്രാപിച്ചപ്പോൾ ശിവസേനയെയും സൈനികരെയും ബോധപൂർവം ദുർബലപ്പെടുത്തി. പാർട്ടിയുടെയും സൈനികരുടെയും നിലനിൽപ്പ് ഉറപ്പാക്കാൻ, ഈ പ്രകൃതിവിരുദ്ധ കൂട്ടുകെട്ടിൽ നിന്ന് പുറത്തുകടക്കേണ്ടത് ആവശ്യമാണ്. മഹാരാഷ്ട്രയുടെ മഹത്തായ നന്മയ്ക്കായി തീരുമാനമെടുക്കേണ്ട സമയമാണിത്," ഷിൻഡെ പറഞ്ഞു.
എൻസിപി അധ്യക്ഷൻ ശരദ് പവാറും എംപി സുപ്രിയ സുലെയും ബുധനാഴ്ച മഹാരാഷ്ട്ര മുഖ്യമന്ത്രി ഉദ്ധവ് താക്കറെയെ സന്ദർശിച്ചു. വിമത എംഎൽഎമാരിൽ നിന്ന് ഔദ്യോഗിക പ്രസ്താവന ഉണ്ടായാൽ മുഖ്യമന്ത്രിക്ക് അനുവദിച്ച ഔദ്യോഗിക വസതിയിൽ നിന്ന് രാജിവെക്കാൻ തയ്യാറാണെന്ന് ഉദ്ധവ് സംസ്ഥാനത്തെ അഭിസംബോധന ചെയ്തുകൊണ്ട് പറഞ്ഞിരുന്നു.
അവർ തൻറെ മുന്നിൽ വന്ന് ആവശ്യപ്പെട്ടാൽ രാജി കത്ത് നൽകുമെന്നും താൻ മുഖ്യമന്ത്രിയായി തുടരരുതെന്ന് ഏതെങ്കിലും എംഎൽഎമാർ ആഗ്രഹിക്കുന്നുവെങ്കിൽ, വർഷ ബംഗ്ലാവിൽ (മുഖ്യമന്ത്രിയുടെ ഔദ്യോഗിക വസതി) നിന്ന് എന്റെ എല്ലാ സാധനങ്ങളും മാതോശ്രീയിലേക്ക് കൊണ്ടുപോകാൻ തയ്യാറാണെന്നുമായിരുന്നു ഉദ്ധവ് താക്കറെയുടെ വാക്കുകൾ.
അതിനിടെ, വിമതവിഭാഗത്തിന്റെ ഭാഗമായ 34 ശിവസേന എംഎൽഎമാർ ഏകനാഥ് ഷിൻഡെയെ ശിവസേന ലെജിസ്ലേച്ചർ പാർട്ടി നേതാവായി നിയമിച്ചുകൊണ്ടുള്ള പ്രമേയം പാസാക്കി. പ്രത്യയശാസ്ത്രപരമായി പുറത്തുള്ളതും പാർട്ടിയെ എതിർക്കുന്നതുമായ എൻസിപിയും ഇന്ത്യൻ നാഷണൽ കോൺഗ്രസും ചേർന്നുള്ള സർക്കാർ രൂപീകരണത്തിൽ പാർട്ടി കേഡർമാർക്കിടയിൽ കടുത്ത അതൃപ്ചിയുണ്ടെന്ന് പ്രമേയത്തിൽ അവർ പരാമർശിച്ചു. .
